இசையமைப்பாளர் தேவா மறைவு: மார்க்சிஸ்ட் கம்யூனிஸ்ட் கட்சி இரங்கல்!

<p>புகழ்பெற்ற இசையமைப்பாளரான ‘தேனிசைத் தென்றல்’ தேவாவின் மறைவுக்கு மார்க்சிஸ்ட் கம்யூனிஸ்ட் கட்சி இரங்கல் தெரிவித்துள்ளது.</p><p>இது குறித்து கட்சியின் மாநிலச் செயலாளர் பெ.சண்முகம் வெளியிட்டுள்ள அறிக்கையில் கூறியதாவது:</p><p><strong>“</strong>புகழ்பெற்ற இசையமைப்பாளரான &quot;தேனிசைத் தென்றல்&quot; தேவாவின் மறைவு தென்னிந்திய திரையுலகிற்கு பெரும் இழப்பாகும். 40 ஆண்டுகளில் 450 திரைப்படங்களுக்கு இசை அமைத்துள்ளார். தமிழ் மட்டுமல்ல கன்னடம், தெலுங்கு திரைப்படங்களுக்கும் இவரது இசைப் பங்களிப்பு இருந்திருக்கிறது. எளிய மக்களின் வாழ்க்கையை, பாடுகளை உள்ளடக்கிய &quot;கானா&quot; வடிவம் இவரால் திரைப்படங்களில் அறிமுகம் ஆகி எல்லோரின் கவனத்தையும் ஈர்த்தது.</p><p>1986 - 2026 வரையிலான இவரின் இசைப் பயணம் கலையுலக வரலாற்றில் அழியாப் பதிவுகளாக நிலைத்து நிற்கும். கலை மாமணி விருது பெற்றவர். &quot;பாட்ஷா&quot; &quot;அருணாச்சலம்&quot; &quot;ஆசை&quot; &quot;வாலி&quot; உள்ளிட்ட வெற்றித் திரைப்படங்கள் இவரின் இசையில் உருவானவை. அவரே பாடல்களை எழுதி பாடியவர். இசையின் பல்வேறு பரிமாணங்களிலும் தனது அற்புதமான ஆற்றலை வெளிப்படுத்திய கலை ஆளுமையை தமிழ்நாடு இழந்திருக்கிறது.</p><p>மறைந்த தேவா அவர்களுக்கு மார்க்சிஸ்ட் கம்யூனிஸ்ட் கட்சியின் தமிழ்நாடு மாநில செயற்குழு தனது நெஞ்சார்ந்த அஞ்சலியை உரித்தாக்குகிறது. அவரது பிரிவால் வாடும் அன்னாரது குடும்பத்தினருக்கும், ரசிகர்களுக்கும் ஆறுதல்களை தெரிவித்துக் கொள்கிறது.” இவ்வாறு அவர் தெரிவித்துள்ளார்.</p>